مشروع المخدات الفيبر

 مشروع المخدات الفيبر ربحها 200 فى المئة سهل بيعها وتسويقه وايضا صناعتها لا تحتاج الى مهارة
مستلزمات المشروع:


كيس فيبر ب 10 جنيه

خيط ومقص



التكلفة للمخدتين عشرين جنيه بس وبتعملى المخدتين وتبعى الواحدة ب25 جنيه او عشرين جنيه
ممكن تبيعى لكل جيرانك وقرايبك وسهل شحنها وكمان تسويقها على محلات الهدايا بانك تعملى المخدة من خامات مميزة ويبقى فيها تطعيم باكسسوارات باقية او متكسرة عندك

قماش بفته ابيض المتر ب3 ونص

مشروع تصنيع الشموع

المشروع ده ربحه عاااااااااااااااااااالى جدااااااااااا

شموع الزينة وهي ذات رائحة مميزة بأنواع العطور المختلفة وتستخدم لأغراض الزينة وتكون الروائح المضافة إما بغرض إضفاء رائحة طيبة للمكان أو لطرد الحشرات الطائرة .. ويكون المنتج في هذه الحالة مرتفع الثمن عن المنتجات التقليدية ويتخذ أشكالا متعددة تشكل علي هيئة مجسمات إنسانية أو نباتية أو حيوانية أو أي تشكيلات فنية أخري .

شموع الهدايا والتحف وترتبط عادة بمنتج آخر لاحتوائها علي الفضيات والخزف والزجاج .. أي أن المنتج الشمعي هو جزء من المنتج العام حيث يساعد في إضفاء قيمة جمالية ولونية لمنتجات أخرى ويساعد في سهولة تسويقها وتعدد استخدامها

السوق المصرى محتاج جدا للصناعة دى لانها بتستورد الشموع من الخارج

وطبعا اغلبه النوع الصينى اللى نوعه ردئ جداااااااا

مستلزمات المشروع:

شمع البرافين (من عند العطار)

 الخامات المطلوبة لتشكيل وصناعة الشمع ..

 
الوان وصبغات

 
خيوط فتيل(خيوط قطن)

 

بنربطها بقلم او اوي حاجة عشان الخيط ميقعش جوة الشمعه واحن بنحضرها

الاوانى المطلوبة

 

ودة بصراحة مش عارفة هو مهم وللا لا بس لو عندكم ماشي مش عندكم مش مهم وهو عالعموم مش مكلف شراؤة

......

 

....عدد 2 اناء من لعمل حمام بخار للشمع

 

..........ترمومتر

 

 

علي فكرة يا بنات سعر الشمعه الوحدة من دول مش بيقل عن 15 جنية يعني ربح حلو اووي وانتي وشطارتك فالتخفيضات والعروض اللي تعمليها والدعاية دي بتكون احلي حاجة

ودي اشكال تانية

 

 

 

والاشكال اللي عالشمعه دي عبارة عن صدف بحر او ورود مجففة ممكن تلزقيها بقلم شمع او صمغ لو نفع

وانتي وزوقك في اشكال الشمع والوانة

.....

اول خطوات الصناعة هى اذابة الشمع فى حمام مائى
حتى نصل لدرجة حرارة 270 درجة وذلك بواسطة الترمومتر
اضافة الالوان والزيوت العطرية


هنسكب الشمع المنصهر على اللون مع التقليب

 
تحديد مكان الفتيل ويجب تثبيتة باحكام
إضافة خيط الشمع في منتصف القالب المعدني للشمعة

من الممكن استخدام ميزان خاص بربط الفتيل او استخدام الطريقة التقليدية

وهى عيدان خشب وربطها بهذا الشكل

 

 يترك للتجمد وحتى يصبح صلب 

 

 يتبع

 

مشروع الحضانة

كتير من الناس بتنفذ المشروع ده داخل المنزل

او لو عندها بيت ...ممكن تستغل الدور الارضى فى المشروع ده

مشروع سهل ومربح

مستلزمات المشروع :

المستلزمات بتختلف باختلاف المنطقة المحيطة بالمشروع (المستوى الاجتماعى)

من خلال خبرتى مع احدى صديقاتى بدأت بغرفة واحدة فى الدور الارضى

واهم حاجة المكان يكون فىه تهوية جيدة

وشوية كتب تلوين والوان خشب

ومرجيحة صغيرة

 وفرشت المكان بموكيت

سبورة وطباشير

وشوية بلاين ساعة الافتتاح للفت انظار الاطفال

شوية دباديب متعلقين فى المكان

لوحات تعليمية للحروف والارقام

بالنسبة للتسويق للمشروع:

يتم طبع اعلان وعمل الف نسخة تقريبا بتتكلف 60 جنيه

وتلزقيها على البيوت وعلى حوائط المحلات

والاماكن اللى فى تجمع للناس

وهتبدأى تاخدى على الطفل بدءا من 50 جنيه او اكتر على حسب مستوى المنطقة

مع الاخذ فى الاعتبار ان انتى تاخدى من سنوات 3 لخمسة او ستة علشان مش تحتاجى لعمالة معاكى سواء مدرسات او دادات

فى البداية

مشروع تفصيل الملابس البيتى (حريمى واطفال)

المشروع ده برضه من المشروعات المربحة

لان فى الاصل اسعار الملابس فى المحلات غالية جدا بدون لازمة وموديلات عادية ومفيهاش شغل يناسب سعرها

مستلزمات المشروع :

ماكينة خياطة عادية

واليابانى منها ب300 جنيه



ماكينة اوفر (ولو مش متوفرة ممكن تعملى الاوفر عند محل المتخصص لكده)



مجموعة خيوط

مقص

وطبعا يكون فى خلفية عن الخياطة وكيفية رسم الباترونات وده منتشر على النت وموجود شروحات وافية

بالنسبة للقماش ممكن الزبائن هى اللى تجيبه لك وانتى عليكى التفصيل

او فى مناطق بتبيع باسعار كويسة زى سوق المطرية والازهر

وفيه اماكن بتبيع القماش بالكيلو ...اكيد فى ناس عارفين الاماكن دى

المشروع مجرب وربحه تحفة

يعنى التريننج البيتى القطيفة بيتباع فى المحلات ب120 الى 150

انا عملته تكلفة وشغل ايدى ب 85 جنيه بس

ولو الزبونة هى اللى هتشترى القماش تاخدى شغل ايدك 30 جنيه لو عاملة شغل تطريز فيها او حركات كده

دى بعض من شغلى

والشغل اللى عليه عملاه بماكينة بروزر ودى كنت جيباها ب1000 جنيه

 




 
 

التسويق بتبدأى من الجيران والاقارب والاصدقاء

وكمان تعرضى شغلك على المحلات اللى حواليكى

مشروع تفصيل شنط من البناطيل الجينز المستعمل (حالته جيدة)

المشروع ده من المشروعات اللى ربحها كويس جدا ولكن فيها شغل كتير شوية ومحتاجة اتقان وذوق وتجديد

مستلزمات المشروع:

ماكينة منزلية عادية يفضل الماكينة سنجر او المكن الصناعى لو متوفر عندك لان الجينز محتاج ماكينة شديدة

ابر خياطة رقم 18 مشطوفة لانها دى المناسبة لخياطة الجينز

شوية خرز خشب على نوعيات مختلفة (حسب الذوق)

قيطان الوان مختلفة (من عند الخردواتى)

بناطيل جينز ...(طبعا بتستغلى اللى عندك وتعرضيه او لو مش عندك بتبتدى تاخدى من كلعميلة البنطلون المتوفر عندها وبتعمليهولها )

وطبعا قماش للبطانة

مقص

كيفية التنفيذ:

البنطلون الواحد بيطلع شنطتين مختلفتين التصميم ...

دى من الارجل
 

ودى من الجزء العلوى للبنطلون


او ممكن تطلعى منه شنطة مدرسة  او شنطة للنادى (دى شغل ايدى)








او شنطة زى ديه ...بس ديه مكلفة شوية



كل ده انا نفذته زيه واحلى كمان لانى حطيت لمساتى الخاصة عليه الحمد لله وبيعت منه كتير وكان مطلوب اوى لانه بينفع للنوادى والجامعات وبيليق على لبس كتير اوى وشاكرت بيه فى معارض

وعلشان تسوقى كويس تميزى فى سعرك وخلليكى ارخص من بره قليلا علشان تكسبى عملاء يفضلوا التعامل معكى انتى

يا ريت اللى مهمتة بالمشروع ده وعايزة تنفذى تقولى وانا اقول لها تفاصيل اكتر فى طريقة التفصيل ان شاء الله

مشروع رسم الحنة على الجسم والاظافر

ده من المشروعات اللى راس مالها قليل جداااااااااااا والربح عالى جدا جدا جدا

مستلزمات المشروع:

حنة عادية(من عند العطار) هاتى مبدأئيا تمن كيلو

حجر اسود مطحون(من عند العطار)هاتى ب5 جنيه

قولى للعطار يطحنهولك علشان ده بيبهدل الدنيا كلها لو طحنتيه فى البيت

كريم اكسجين 30 (من الصيدلية )ب 3 جنيه ونص

سيخ خشب (الخاص بشيش الطاووق) علشان هنرسم بيه ده اكيد موجود فى كل بيت

كتالوج رسومات
وده تجمعى الصور اللى تعجبك على النت وتطبعيها وتعملى الكتالوج بتاعك او لو عندك موهبة ابتكار رسومات يبقى كويس طبعا

الطريقة :

بتضعى الحنة + الحجر الاسود المطحون بمقدار 2:3

يعنى لو هتستعملى الملعقة الكبيرة يبقى 3 حنة + 2 حجر اسود

وينخل كل على حدى فى منخل ضيق ونخلطهم جيدا فى برطمان زجاج يبقى كده بودرة الحنة السوداء جاهزة للاستخدام

عند العجن .....

تعجن بماء ساخن وتقلب جيدا ثم نضع كريم الاكسجين حتى تصلى للقوام المناسب للرسم

ملاحظات مهمة :

يجب عجنها فى غطاء صغير ...زى معيار الادوية اللى بيكون مع زجاجات الدواء

علشان مش ينفع نعجن كمية كبيرة لان مفعولها بيروح بسرعة ومش هتعطى اللون الاسود الغامق اذا ظلت فى الجو فترة طويلة وانتى بترسمى

يعنى تاخدى مقدار نصف ملعقة كبيرة وترسمى واذا احتاجتى تانى اعجنى كمية تانية زيها

مشروع مربح جدا وتكلفته معدومة بالنسبة للربح وكمان اكتر موسم ليه فى الصيف طبعا والربيع والافراح

ده انا مجرباه وانصحكو تجربوه ..اتمنى لكن التوفيق

مشروعات راس مالها 100 جنيه او اقل

فى البداية سنتطرق ان شاء الله للمشروعات المتناهية فى الصغر واللى مش هتحتاج راس مال كبير حتى تكون نقطة انطلاقة للمشروعات الاكبر ان شاء الله
سنجمل المشروعات اولا فى نقاط ثم سنفرد كل مشروع بالشرح الوافى ان شاء الله

من امثلة هذه المشروعات :

1- مشروع رسم الحنة 

2- مشروع تفصيل شنط جينز من البناطيل المستعملة ( بحالة جيدة)

3-مشروع تفصيل الملابس البيتى (حريمى واطفال)

4- مشروع المخدات الفيبر

5-مشروع صناعة الشموع

6- مشروع حضانة

7- مشروع اكسسوارات

8- مشروع صناعة الصابون السائل

9- مشروع صناعة الشامبو

10- مشروع صناعة الدمى ( عروسة الاطفال)

11- مشروع التطريز من المنزل

12- مشروع تفصيل الملايات

13- مشروع دروس خصوصية

14- مشروع مفارش السفرة

15- مشروع الاكل البيتى

16- مشروع المشروم (عيش الغراب)

17- مشروع عمل كروت وصناديق الهدايا

18- مشروع الكروشيه (لانجرى واكسسوار وشنط وملابس اطفال)

19- مشروع عمل الطرح الجاهزة بدون دبابيس

20- مشروع عمل طحينة

وان شاء الله سيتم اضافة المزيد من المشروعات ذات رأس المال البسيط

وايضا سيتم طرح مشروعات عن طريق النت والتعرف على انواعها والغوص فى اعماقها

اتمنى ان كل امرأة تبحث عن عمل ان تجد ضالتها عندنا

ان كنتى فى مركب حائر فى بحر واسع فارسى على شاطئنا تجدى ضالتك

العمل من المنزل

نظرا لظروف كثير من السيدات التى لا تسمح لهن ظروفهن للعمل خارج المنزل وفى نفس الوقت تكون فى احتياج مادى شديد للعمل
نطرح بين ايديهن هذه المدونة والتى ستضم ان شاء الله كل انواع العمل المتاحة من داخل المنزل
ونسأل الله التوفيق والسداد وان ينفع بها